Is Goliat die
werklike probleem?
En die
Filistyne het hulle leër versamel vir die oorlog en bymekaargekom by Sogo wat
aan Juda behoort, en laer opgeslaan tussen Sogo en Aséka in Efes-Dammim. Maar
Saul en die manne van Israel het byeengekom en laer opgeslaan in die dal van
die terpentynboom en hulle in slagorde teenoor die Filistyne opgestel. En die
Filistyne het duskant teen die berg en die Israeliete oorkant teen die berg
gestaan, sodat die dal tussen hulle in was. Toe kom daar ‘n baasvegter uit die
laers van die Filistyne, met die naam van Góliat, uit Gat; sy hoogte was ses el
en ‘n span. Daar was ‘n koperhelm op sy hoof, en hy het ‘n pantser van skubbe
aangehad—die gewig van die pantser was vyf duisend sikkels koper— en skeenplate
van koper was aan sy bene en ‘n koperlans tussen sy skouers. Die steel van sy
spies was soos ‘n wewersbalk, en die lem van sy spies was van ses honderd
sikkels yster, en die skilddraer het voor hom uit geloop. En hy het gaan staan
en roep na die slagordes van Israel en vir hulle gesê: Waarom trek julle uit om
jul in slagorde op te stel? Is ek nie die Filistyn, en julle dienaars van Saul
nie? Kies vir julle’n man uit, dat hy na my toe afkom. As hy teen my kan veg en
my verslaan, sal ons julle slawe wees; maar as ek hom oorwin en hom verslaan,
moet julle ons slawe wees en ons dien. Verder sê die Filistyn: Ek daag die
slagordes van Israel vandag uit! Gee my ‘n man, dat ons saam kan veg. Toe Saul
en die hele Israel hierdie woorde van die Filistyn hoor, was hulle verskrik en
baie bevrees.
(1Sa 17:1-11)
Wat is
Israel se probleem, en hoe kan die volk die probleem oplos? Daar het seker allerhande warm gesprekke op
die markplein en in die stede geklink.
Nog warmer was seker die opinies en menings.
Wat is ons
probleem vandag met die wêreld? Vra vir
`n teoloog en jy sal `n ander antwoord kry as wat die politici sal gee. `n Sielkundige sal weer `n ander antwoord as
`n ekonoom gee. Vra vir Bill Gates, en
hy sal waarskynlik sê dat die wêreld mee toegang tot rekenaars moet hê.
Terwyl
Israel so besig is met hulle gesprekke en debate, verskyn Goliat skielik op die
toneel. Hierdie reuse Filistyn word die
een probleem waarop die hele volk fokus.
Die tyd vir gesprekke en debatte is verby, ons grootste probleem is
Goliat die Filistyn.
Vir 40 dae
lank staan die Filistyn en verpes die volk van die Here. “Kom veg met my. Stuur `n man na my toe wat teen my kan kom
veg. Elke dag hoor die Israeliete die
uittarting, die arrogante spottery.
Hulle word self op die heilige Sabbat uitgedaag. “As iemand my kan verslaan, word ons julle
slawe. As ek die geveg wen, is julle ons
slawe.” En toe word Israel vir 40 dae lank slawe van hulle eie vrees.
“Ons het `n
reuse probleem. Goliat is omtrent 3
meter lank. Sy harnas weeg omtrent
62-63kg. en kyk daai man se spies – so dik soos `n wewersbalk. Die punt van die spies alleen weeg omtrent
7,5 kg. Ons probleem het nog `n
wapendraer ook wat voor hom uitloop.”
“Ha! Kyk hoe word my lewe deur die klomp
Israeliete bedreig. My lewe is in
gevaar...” Hoor u die sarkasme, die belediging, die vernedering van die volk
van God in alle opsigte.
Daar sit
die Israeliete in hulle kamp. Een ding
is seker, ons grootste probleem is Goliat. Ons het hierdie een gemeenskaplike probleem,
Goliat is jou probleem en hy is my probleem. En skielik begin daar `n nuwe stryery, `n
nuwe debat – hoe op aarde gaan ons
ontslae raak van die probleem?
Bid hom
weg. Laat Samuel haal, sodat hy die
probleem vir ons kan wegbid. Kom ons kry
`n klompie dapper manne bymekaar sodat ons die man in `n lokval kan inlei. Miskien kan iemand op hom afsluip en hom met
`n pyl skiet. Ja, maar hy het `n harnas
aan – vergaderings, komitees en debatte – parra parra parra.
Die eintlike werklike probleem.
Is Goliat
werklik die probleem? Is die probleem
van die kerk werklik finansies, min invloed of wat ookal? Die werklike probleem is baie baie groter as
Goliat. Waar is jou geloof in die Almagtige God? Maar wat beteken dit om in God te glo?
Geloof is nie positiewe denke nie.
Ons kan nie net glo dat ons vir Goliat kan verslaan nie. Visualiseer jou oorwinning oor Goliat...en as
jou droom verby is dan staan Goliat nog daar in sy volle grootte en tart jou
uit. Kom ons psyche onsself op, sommer
met trompoppies en allerhande strydkrete, totdat ons genoeg geloof het om die
reus te verslaan. As ons dit doen, sal
ons `n krag in ons ontdek wat ons nie eens geweet het ons besit nie. Ontdek jou “inner self” en presto – daar val
Goliat. Ek is nie `n positiewe denker nie, ek wil veel eerder `n gelowige wees.
Geloof beteken nie om in jouself te glo nie.
“Believe in youself” is die grootste gif wat in ons geloofslewe kan
insluip want dit werk geloof in God teen.
geloof is nie `n positiewe manier van dink nie. Nog minder is dit om maar net te aanvaar dat
alles op die een of ander manier gaan uitwerk.
Geloof volgens die Bybel is `n baie presiese
saak. Dit beteken om God absoluut,
onvoorwaardelik op Sy geopenbaarde Woord te neem. Glo wat God aan jou geopenbaar het.
Maar wat
van die reus wat hier voor ons staan?
Geloof werk immers in die praktyk.
Israel is
hier reg langs die Jordaan, op die rand van die beloofde land. God het ons mos uit Egipte verlos, God het mos water en voedsel voorsien. Ons klere en ons skoene het nie verslyt
nie. Ons is uiteindelik by die beloofde
land – hoera! Nou kan ons die land
inneem.
En tog
gebeur dinge so anders. Hier is reuse in
Kanaan, ons is nou diep, diep in die moeilikheid. En
eers 40 jaar later, nadat `n ongelowige geslag uitgesterf het, het Israel
uiteindelik op God se beloftes vertrou.
Israel gaan Kanaan binne terwyl die reuse nog steeds daar is. Hy het nie die reuse laat verdwyn nie. Hierdie
geslag wat nou die land ingaan sien egter kans vir die reuse.
Die Here
het gesê dat ons Kanaan sal inneem. Hy
het gesê dat ons sal oorwin. Die Here
het nooit iets gesê van groot of klein vyande nie – Hy het gesê dat ons die vyand sal verslaan. Hy het gesê dat ons meer as oorwinnaars in
Christus Jesus onse Here is.
God het
niks gesê van Goliat nie. Die Israeliete
krimp ineen van die vrees. Tye het
verander. Die vorige dinge was so lank
lank gelede. Ons lees in 1 Samuel 14 dat
Jonatan `n hele leërafdeling van die Filistyne verslaan het. Dit was maar klompie jare voordat Goliat ou
grootbek op die toneel verskyn het. Waar
is Jonatan nou?
In die aand sit die volk om die vuur en praat
oor Goliat, maar hulle praat so min oor die lewende God.
Goliat sien Israel se ongeloof raak, terwyl
Israel net vir Goliat raak sien.
Daniel Doriani se kommentaar op v8 “Am I not a
pagan, God hating Philistine? Then why
won’t any of you men of the Living God fight me? You must not really believe in Him at all! In fact, you must believe a nine foot warrior
is actually stronger than your living God, when it comes to the REAL battle”.
God gee in genade die oplossing vir Goliat.
Een dag,
terwyl Goliat so besig is met sy spottery en uitdagings – juis op daardie
presiese toevallige oomblik daag Dawid daar op.
Sy ore tuit en sy hart slaan aan die brand “Hoe durf hierdie Filistyn,
hierdie heiden so met die Here spot? Toevallig het God se oplossing op daardie
presiese oomblik daar aangekom.
Daarop het
Dawid die manne wat by hom staan, gevra en gesê: Wat sal met die man gebeur wat
hierdie Filistyn verslaan en die smaad van Israel wegneem? Want wie is hierdie
onbesnede Filistyn, dat hy die slagordes van die lewende God durf uitdaag?
(1Sa 17:26)
En Dawid het
aan Saul gesê: Laat die manne se moed tog nie ter wille van hom sink nie. U
dienaar sal gaan en teen hierdie Filistyn veg.
(1Sa 17:32)
Met `n
slingervel en gladde klippies in sy hand loop Dawid vir Goliat tegemoet. In sy
hart brand die ywer vir God se eer en `n vaste vertroue in God en dat God `n
Waarmaker van Sy eie Woord is. Hy gaan
in die krag van die Gees van God.
Dit is so briljant. Skielik keer
God die situasie om en spot met Goliat.
Die Here spot uit die hemel met die goddelose.
Saul en die
ander manne sê Sjoe! Dankie tog dit is
nie een van ons wat die reus moet gaan face nie. En die Here gebruik een gladde ronde klip om
vir Goliat mee neer te vel. Die Here lag
vir die goddelose. Dawid, `n klip en `n slingervel – God se instrumente verslaan die reuse probleem.
Die lewende God is nog op die troon. Sy beloftes staan nog steeds vas. God het groot dinge vir die toekoms van Sy
volk – Hy het `n verlosser vir Israel gestuur.
God het ook
vir ons `n Verlosser gestuur wat die koninkryk van die duisternis oorwin
het. Hy doen dit deur `n kruisdood. `n Joodse Rabbi sterf aan `n kruishout in
smarte, pyn en ellende en vernietig daarmee die Satan en al sy bose magte.
Tog maak
die kerk, die gelowiges nie `n groot impak op die wêreld nie. Kan God weer vir die kerk `n John Knox
stuur? Kan God vir Suid-Afrika `n Billy
Graham opwek wat die land kan omkeer? Is
dit moontlik dat God Pietersburg werklik kan verander? Het die Here dit al in die verlede met stede
en lande gedoen?
As Ek die
hemel toesluit, dat daar geen reën is nie, of as Ek die sprinkaan beveel om die
land af te eet, of as Ek pes onder my volk stuur, en my volk, oor wie my Naam
uitgeroep is, hulle verootmoedig en bid en my aangesig soek en hulle bekeer van
hul verkeerde weë, dan sal Ék uit die hemel hoor en hulle sonde vergewe en
hulle land genees. Nou sal my oë oop wees en my ore luister na die gebed van
hierdie plek.
(2Kr 7:13-15)
Het God dit
gesê? Doen God wat Hy belowe het?
Die kerk
het so dikwels min impak op die wêreld. Maar
die kerk het so dikwels min impak op haar eie lidmate. Ons denke en filosofieë het so wêrelds
geword. Sonde word so maklik geïgnoreer
dat iemand eendag tereg opgemerk het: “The Christians are many, but they are
not much.” Ons het so baie Goliatte voor
ons.
Op klein
dorpies en selfs in stede is daar so baie gemeentes wat hulle deure sluit. Sekularisasie vernietig die kerk. Die regering bedreig die kerk met sy beleid. Is
ons probleem Goliat of te min vertroue in God en Sy verlossende krag deur die Evangelie
boodskap.
Werk God net in gunstige omstandighede, wanneer
die klimaat reg is?
Want ek skaam
my nie oor die evangelie van Christus nie, want dit is ‘n krag van God tot
redding vir elkeen wat glo, eerste vir die Jood en ook vir die Griek.
(Rom 1:16)
Glo ons
werklik in God en in God se Woord? Is
die beloftes van die Here genuine? Of
probeer ons eers `n gunstige klimaat skep, sodat God kan werk? Het ons Saul se harnas nodig om ons te
beskerm, of sien ons kans om met die wapenrusting van God te veg? Sien ons genuine kans om die Boodskap van `n
gekruisigde Redder in `n donker wêreld in te gooi met `n slingervel en die krag
van die Gees van God?
Is ons probleem Goliat, of is hy net die
simptoon van `n dieper probleem?